O Gran Camiño 2026, que percorreu durante cinco xornadas as catro provincias galegas o pasado mes de abril, constituíu un evento deportivo de primeiro nivel que levou a Galicia por todo o mundo e xerou un importante retorno económico directo sobre empresas e entidades da comunidade, así como tamén de valor publicitario engadido.

A organización, ante a necesidade de obter unhas métricas de impacto fiables, recorreu á maior multinacional en análise de retorno, Cisión, que puxo cifras ao impacto das cinco xornadas a nivel de difusión e retorno económico.

Segundo recolle este informe, o evento chegou a máis de 819 millóns de persoas en todo o mundo a través das diferentes canles e xerou un valor publicitario equivalente a 36,8 millóns de euros.

De feito, só a emisión televisiva de Eurosport chegou aos 5,5 millóns de espectadores en canles lineais europeas, audiencia á que habería que sumar os datos de HBO Max e outras áreas xeográficas, como Asia/Pacífico ou América; a emisión pola ETB e a importante presenza na TVG.

En total, superáronse as 158 horas de exposición televisiva da proba, máis de 5.000 informacións publicadas por medios de comunicación de todo o mundo e case medio millón de interaccións en liña.

REINVESTIMENTO LOCAL

O crecemento ano a ano da proba, así como do seu orzamento grazas á unión da Xunta de Galicia e as catro deputacións provinciais cos nosos patrocinadores privados, supuxo, tendo en conta os datos, un reinvestimento moi rendible para os efectos de visibilidade e promoción de Galicia.

Ademais, a organización demostrou un ano máis un forte compromiso co tecido empresarial e comercial galego, no que se realizou un importante investimento en consumibles, materiais, alimentación e aloxamento. De feito, o evento contou con 80 provedores directos e máis de 120 empresas, profesionais e negocios galegos implicados.

Os máis de 126.500 quilómetros percorridos por toda Galicia pola caravana de O Gran Camiño 2026, incluído o seu importante equipo de montaxe, implicaron 3.500 noites en establecementos hoteleiros ao longo e ancho da comunidade e 15.000 servizos de alimentación, todos en hostalaría local. Empregáronse máis de 11.000 litros de combustible abastecidos en estacións de servizo e gasolineiras locais.

En total, o evento implicou o traballo de case 700 persoas de forma directa e supuxo unhas 40.000 horas de traballo acumulado en preparación, produción e desenvolvemento, tanto de persoal directo de EME Sports como de empresas galegas colaboradoras dos máis diversos ámbitos.

O equipo de O Gran Camiño atópase xa inmerso no deseño e preparación da edición 2027 da proba, unha convocatoria especial con motivo do Xacobeo, pero que continuará apegada aos sinais de identidade da proba: o compromiso co territorio galego, o Camiño de Santiago e o percorrido polas catro provincias.